(ខេត្តមណ្ឌលគិរី )៖ នៅមុខបរិវេណនៃសាលាឃុំចុងផ្លាស់ នៃស្រុកកែវសីមា កាលពីរសៀលថ្ងៃទី១៣ ខែឧសភា ឆ្នាំ២០២៥ ក្រុមប្រជាពលរដ្ឋចាស់ក្មេងប្រុសស្រីប្រមាណជិតមួយពាន់នាក់ បានជួបជុំគ្នា ក្នុងគោលបំណងស្នើសុំកិច្ចអន្តរាគមន៏ពីសម្តេចបវរធិបតី ហ៊ុន ម៉ាណែត នាយករដ្ឋមន្ត្រី ជុំវិញបញ្ហាកង្វះនៅជីវភាពប្រចាំថ្ងៃ ដែលពួកគាត់បានជួបប្រទះក្រោយមានការហាមឃាត់ មិនឲ្យពួកគាត់ធ្វើរបររ៉ែងកាកសំណល់ដីរ៉ែមាសចាស់ៗដែលសេសសល់តាំងពីជំនាន់ឆ្នាំ៨០ផ្លាយ និងដីសល់ពីសហគមន៍រ៉ែមាសចាស់ជាច្រើនឆ្នាំមកនោះ។
លោក ស៊ុន គីមស៊្រាន តំណាងប្រជាពលរដ្ឋរស់នៅភូមិពូទុង បាននិយាយថា គាត់បានទៅរស់នៅតំបន់ចុងផ្លាស់នេះជិត៣០ឆ្នាំមកហើយ ចំណែកការប្រកបរបរចិញ្ចឹមជីវិតរបស់ពួកគាត់គឺអាស្រ័យលើការរករ៉ែមាសបន្តិចបន្តួចតាមគំនរដីដែលគេបោះបង់ចោលតាំងពីអំឡុងដើមឆ្នាំ១៩៩០មកម៉្លេះ។ហើយគំនរដីខ្លះគឺជាសំណល់សល់ពីក្រុមសហគមន៍រ៉ែមាសចុងផ្លាស់ទុកចោល ក្រោយសហគមន៍នេះត្រូវបានរំលាយកាលពីអំឡុងឆ្នាំ២០១៦-២០១៧ ដោយដី កន្លែងដែលពួកគាត់រស់នៅ មិនអាចប្រកបរបរកសិកម្មបានទេ ព្រោះតំបន់នេះភាគច្រើនជាដីមានថ្មដា ម៉្យាងទៀតពួកគាត់ក៏គ្មានលិទ្ឋភាពចាកចេញទៅរកស៊ីអ្វីនៅភូមិស្រុកដទៃទៀតបានដែរ ទើបពួកគាត់សម្រេចចិត្តនាំគ្នាកាប់គាស់រ៉ែងដីសំណល់រ៉ែ ចាស់ទាំងនោះដើម្បីបានចំណូលផ្គត់ផ្គង់គ្រួសារ ។
លោក ស៊ុន គីមស៊្រាន បានបន្តថា ដើម្បីបានអង្កច្រកឆ្នាំងអ្នកភូមិបាននាំគ្នាកាប់ដីរ៉ែងរករ៉ែមាសបានបន្តិចបន្តួច ដ្បិតដីសំណល់នេះត្រូវបានគេកែច្នៃរួចម្តងទៅហើយ តែជាអកុសល់ការខិតខំរកកម្រៃរបស់ពួកគាត់សម្រាប់ចិញ្ចឹមគ្រួសារ គឺត្រូវបានបង្ក្រាបជាបន្តបន្ទាប់ពីមន្ត្រីជំនាញពាក់ពា័ន្ឋ ហើយអ្នកភូមិខ្លះត្រូវបានមន្ទីរបរិស្ថានខេត្តឃាត់ខ្លួនបញ្ជូនទៅតុលាការទៀតផងគ្រាកន្លងមក។ លោកបានសម្តែងនៅពាក្យពេជ្របន្តថា បើនៅតែបែបនេះតើពួកគាត់រំពឹងអ្វី?ព្រោះជុំវិញ ភូមិឋានដែលពួកគាត់រស់នៅនេះ សុទ្ឋតែដីអភិរក្សសត្វព្រៃនិងដីក្រុមហ៊ុនរ៉ែមាសធំៗ តើអាចអនុញ្ញាត្តឲ្យពួកគាត់សុំតែរស់នៅអាចធ្វើរបរលក្ខណៈគ្រួសារបានទេ? ។
លោកតា អ៊ុត សំ ព្រឹទ្ឋាចារ្យរស់នៅឃុំចុងផ្លាស់តាំងពីជំនាន់បែកសម័យប៉ុលពត មានប្រសាសន៍ថា អ្នកភូមិរស់នៅទីនេះស្ទើរ១០០%ហើយដែលបានអាស្រ័យជីវិតជាមួយរបររ៉ែងរកមាស ។លោកតាអះអាងថា ការជួបជុំគ្នាលើកនេះពួកគាត់គ្មានបំណងណាមួយបង្កបាតុភាពដល់ សង្គមឬការឈឺក្បាលដល់អាជ្ញាធរឡើយ ពួកគាត់គ្រាន់តែចង់បានការអនុញ្ញាតពីក្រសួងជំនាញរ៉ែ និងថាមពល និងការសណ្តោសប្រណីពីសម្តេច បរវធិបតី ជាប្រមុខថ្នាក់ដឹកនាំ ជួយឲ្យអ្នកភូមិមានលទ្ធភាពធ្វើរបរចិញ្ចឹមជីវិតដូចសព្វមួយដង ។បើនៅតែបែបនេះអ្នកភូមិអាចនិងដាច់ពោះស្លាប់។
ក្នុងការជួបជុំគ្នាខាងលើនេះ អ្នកភូមិដែលតំណាងឲ្យប្រជាពលរដ្ឋ ប្រមាណជិតមួយពាន់គ្រួសារ បានសង្ឃឹមយ៉ាងមុតមាំដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មិនទុកឲ្យប្រជាជនណាម្នាក់រងគ្រោះប៉ះពាល់ជីវភាពគ្រួសារ ចាកឆ្ងាយភូមិស្រុករបស់ខ្លួន ដែលធ្លាប់រស់នៅជួបជុំសាច់ញាតិ ជាពិសេសការចំណាកស្រុកនោះឡើយ៕
Post a Comment